English
Cymraeg
Croeso
Croeso i Brifysgol Caerdydd. Rwy’n gobeithio y bydd y pecyn gwybodaeth hwn o gymorth wrth i chi baratoi eich cais.
Ymunais â Phrifysgol Caerdydd i fod yn Gadeirydd y Cyngor yn 2022, felly gallaf rannu ychydig o’r hyn wnaeth fy nghymell i wneud cais am y rôl honno, a’r hyn rwyf wedi’i ddysgu am y Brifysgol hyd yma.
A minnau’n gyn-fyfyriwr, roedd gen i gysylltiad â’r Brifysgol eisoes ar ôl graddio yn 1987. Fe wnaeth fy mhrofiad yn y brifysgol drawsnewid fy mywyd, felly fy awydd i helpu Caerdydd i barhau i alluogi mynediad at brofiadau addysgol uwch trawsnewidiol wnaeth fy ysgogi i wneud cais i fod yn Gadeirydd y Cyngor. Cafodd Prifysgol Caerdydd ei chreu drwy apêl gyhoeddus am gyllid a rhoddion preifat gan y rhai oedd yn cydnabod na allai myfyrwyr yng Nghymru fforddio teithio i Loegr a’r Alban. Wedi’i sefydlu yn 1883, cafodd neuadd un rhyw ei chreu yn 1885 i alluogi menywod i gael mynediad at addysg uwch. Yn 1910 penododd y brifysgol Millicent MacKenzie yn athro, sef yr athro llawn benywaidd cyntaf mewn prifysgol siartredig lawn. Yn 2023, penododd y Brifysgol yr Athro Wendy Larner, yr Is-Ganghellor benywaidd cyntaf yn hanes 140 mlynedd Prifysgol Caerdydd.
Mae’r ymrwymiad cynnar hwnnw i gynnydd cymdeithasol yn parhau hyd heddiw. Mae gan Brifysgol Caerdydd ymrwymiad dwfn i’r cymunedau o’i chwmpas, ac mae ganddi raglenni allgymorth hirsefydlog ar gyfer Cymoedd De Cymru yn ogystal â phrosiectau’r Porth Cymunedol yn ardaloedd Butetown a Grangetown Caerdydd. Mae ei gweithgareddau o ran ei chenhadaeth ddinesig yn rhychwantu ffiniau rhyngwladol hefyd, yn fwyaf amlwg felly yn ei pherthynas â Phrifysgol Namibia ac yn fwyaf diweddar â Phrifysgol Polytechnig Genedlaethol Zaphorizhzhia yn Wcráin.
Mae Caerdydd yn brifddinas fach, glyfar, ac mae’n datblygu’n gyflym. Mae hi’n wahanol i brifddinasoedd eraill y DU wrth gwrs oherwydd y Gymraeg a diwylliant Cymru, ac mae ei hagwedd hamddenol tuag at ei dwyieithrwydd yn debyg i’r hyn a geir mewn llawer o wledydd Ewropeaidd. Mae ganddi hefyd un o gymunedau aml-hil hynaf y DU ac mae’n ddinas gynhenid gyfeillgar – mae gwesteion ar ein Diwrnodau Agored yn aml yn tynnu sylw at y croeso cynnes a roddir iddynt gan y bobl tu mewn a thu allan i’r Brifysgol.
Mae’r brifysgol dafliad carreg o Lywodraeth Cymru, sydd â chyfrifoldeb datganoledig dros addysg uwch. Mae gan Brifysgol Caerdydd berthnasoedd gwaith rhagorol gydag uwch-wleidyddion a’u cynghorwyr. Mae hyn yn adlewyrchu pa mor ganolog yw’r brifysgol yn ymdrechion y genedl i gyflawni ei nodau o ran ymchwil ac arloesi, yn ogystal â datblygiad cymdeithasol, economaidd a diwylliannol. Cymru yw’r unig wlad yn y byd sydd â Deddf Llesiant Cenedlaethau’r Dyfodol, gan olygu ei bod yn ofynnol yn ôl y gyfraith i gyrff cyhoeddus ystyried effaith hirdymor unrhyw benderfyniadau o ran polisïau. Yn ddiweddar, fe wnaethom gytuno i arwain rhaglen gyfnewid ryngwladol ar gyfer dysgu ar ran Llywodraeth Cymru. Mae’r rhaglen yn werth £65m ac yn creu cyfleoedd sy’n newid bywydau ar gyfer myfyrwyr drwy eu galluogi i deithio, gwirfoddoli, dysgu a phrofi diwylliannau eraill.
Bydd 2025-26 yn gyfnod hynod gyffrous a thrawsnewidiol i Gaerdydd wrth i’r Brifysgol geisio cyflawni ei Strategaeth newydd, ‘Ein dyfodol, gyda’n gilydd’. Daw hyn ar adeg pan fo sector Prifysgol y DU gyfan dan straen difrifol; yn wahanol i lawer o’n cystadleuwyr mae gennyn ni Strategaeth flaengar rydyn ni bellach yn gweithio’n galed i’w gweithredu. Cafodd ein Strategaeth ei chreu ar y cyd drwy ymgynghori a gweithio ar y cyd â staff, myfyrwyr a rhanddeiliaid eraill i ddarparu gweledigaeth ar gyfer dyfodol Prifysgol Caerdydd hyd at 2035. Bydd y Cyngor yn chwarae rhan allweddol wrth fonitro cynnydd a chefnogi Bwrdd Gweithredol y Brifysgol, sef tîm arweinyddiaeth y Brifysgol, i gyflawni’r trawsnewid sydd ei hangen i sicrhau bod Prifysgol Caerdydd yn sicrhau ei dyfodol yn arloeswr a gaiff ei chydnabod yn fyd-eang ar gyfer ymchwil, addysg ac arloesi.
Rwy’n gobeithio bod yr wybodaeth yn y pecyn hwn yn eich cymell i wneud cais i fod yn Aelod Annibynnol o Gyngor Prifysgol Caerdydd. Bydd y rolau hyn yn rhoi boddhad, yn eich ysgogi, ac yn rhoi heriau newydd i’r ymgeiswyr llwyddiannus, gan gynnwys y cyfle i ddatblygu’n barhaus yn broffesiynol ac yn bersonol. Mae hefyd yn ffordd wych o wneud gwahaniaeth yn uniongyrchol felly yn un o sefydliadau addysgol mwyaf blaenllaw’r DU, gan helpu i fynd i’r afael â heriau heddiw ac addysgu arweinwyr yfory.
Patrick Younge
Cadeirydd y Cyngor